Jiji la Dar mbioni kubadilika, asema Meya Jerry Silaa akiwa Korea Kusini.........

Meya Jerry Silaa akizungumza kwenye mkutano unaohusu uendeshaji majiji duniani (Global Lab on Metropolitan Strategic Planning) mjini Seolu, Korea Kusini,. Picha na Anthony William.

Mfumo wa jiji la Dar Es Salaam uko kwenye mchakato wa kubadilika.

Hayo yamesemwa leo na Mstahiki Meya wa Manispaa ya Ilala kwenye mkutano wa Global Lab on Metropolitan Strategic Planning unaofanyika jijini Seoul, Korea Kusini.

Akiwasilisha mada ya jinsi mfumo wa uendeshaji majiji unavyochangia utoaji huduma, Meya Silaa ameeleza matatizo ya mfumo usio na muingiliano wa jiji la Dar es Salaam na Manispaa zake na mamlaka nyingine nyingi zinazohudumu kwenye jiji la Dar es Salaam zikiwemo Sumatra, Ewura, Dart, Tanesco, Dawasa, Dawasco, Tanroad, Tamesa na mamlaka nyingine bila kuwa na mfumo wa usimamizi wa kiutendaji.

Meya Silaa ameeleza kuwa katika mradi wa DMDP unaogharamiwa na Benki ya Dunia umefanyika utafiti wa namna ya mfumo wa jiji la Dar Es salaam yaani Institutional Review Analysis (IRA) na Development of Institution Strengthening Plan(ISPs) kwa kila manispaa na kuwa na mfumo bora wa jiji la Dar Es salaam.

Meya wa Manispaa ya Ilala Jerry Silaa (wa pili kulia) akiwa na washiriki wengine kwenye mkutano wa (Global Lab On Metropolitan Strategic Planning) unaohusu mfumo wa uendeshaji majiji mjini Seoul, Korea Kusini.

Dar Es Salaam ndio mji mkubwa Tanzania unaobeba majukumu karibu yote ya kiserikali na kibiashara ukiwa na Bandari ya Dar es salaam na wakaazi milioni 4.4 sawa na asilimia 10 ya wakazi wote Tanzania na ukuaji wa asilimia 5.6 na kuwa jiji la tatu Afrika na la tisa duniani kwa ukuaji.

Kufikia 2025 jiji la Dar Es Salaam linakadiriwa kuwa na wakaazi milioni 8.9 na wakaazi milioni 15.3 kufikia mwaka 2035 na hivyo kuingia kwenye orodha ya majiji makubwa “World Mega Cities List”.

Ni wakati sasa wa kuiangalia Dar Es Salaam kwa umakini mahususi