Ubingwa England bado hautabiriki.................

Wachezaji wa Manchester City wakishangilia moja ya magoli yao walipoifunga Everton 3-2 Jumapili

Manchester City imepiga hatua muhimu katika kuwania taji la ubingwa wa ligi kuu ya England wakirejea kileleni mwa ligi hiyo kwa tofauti ya magoli na Liverpool baada ya kuibwaga Everton, Jumamosi 3-2.

Liverpool katika mchezo wa jana ilikuwa inawaombea majirani zao Everton kuwabwaga Manchester City, na matumaini ya kufanya hivyo yalipanda baada ya Ross Barkley kuifungia Everton bao la mapema dakika ya 11.

Wachezaji wa Liverpool, Steven Gerrard na Coutinho wakishangilia moja ya magoli waliyofunga ligi kuu ya England

Hata hivyo mwenye kupata ni wa kupata, City walikusanya nguvu na kupambana kikamilifu na wenyeji wao, lengo likiwa kupata pointi tatu muhimu. Sergio Aguero, ndiye aliyeanza kusafisha njia ya Manchester baada ya kutupia goli la kusawazisha katika dakika ya 22 ya mchezo na kisha kutoka nje kutokana na maumivu ya nyama za paja. Kutoka kwake kulimpa nafasi Edin Dzeko kuingia na kufunga goli lake la kwanza na la pili kwa Manchester City katika dakika ya 43. Hadi mapumziko dakika 45 za kwanza City walikuwa wakiongoza kwa magali 2-1. Alikuwa Dzeko tena aliyewainua mashabiki wa City kwa kuifungia timu yake bao la tatu katika dakika ya 48.
Everton hawakukubali kuchinjwa kikatili katika uwanja wao wa nyumbani. Romelu Lukaku akafunga goli la pili katika dakika ya 65.
Everton waliendelea kushambulia kutafuta angalau pointi moja, lakini Manchester City wakipigana kutoka na pointi zote tatu. Na ikwa hivyo hadi kipenga cha mwisho Manchester City waliibuka na ushindi wa magoli 3-2.

Wachezaji wa Chelsea katika nyakati za furaha wakishinda

Ikiwa imebaki michezo miwili miwili kukamilisha ligi hiyo, mbio za kuwania ubingwa zinazidi kupamba moto. Timu tatu za Manchester City, Liverpool na Chelsea zote zina nafasi kubwa ya kutwaa kombe hilo. Manchester City ina pointi 80 sawa na Liverpool, lakini inaongoza kwa tofauti ya magoli. City wana magoli 59 ya kufunga na Liverpool mabao 50. Chelsea ina pointi 78, mbili nyuma ya vinara hao wawili. Manchester City na Liverpool zikishinda michezo yao yote iliyobaki zitakuwa na pointi 86, Chelsea itakuwa na pointi 84. Kwa hiyo yeyote atakayeteleza basi ameumia.
Waliokuwa mabingwa watetezi wa kombe hilo, Manchester United nayo imezidi kupatwa na masahibu baada ya kukung'utwa na Sunderland 1-0 katika mchezo wao wa Jumamosi na hivyo kurejea katika nafasi yake pendwa ya 7 msimu huu wakiwa na pointi 60 na hivyo kuwa na uhakika wa kukosa ubingwa wa ligi kuu ya England na pia mashindano ya UEFA msimu ujao.
Fulham na Cardiff tayari zimeshuka daraja, hivyo msimu ujao hazitakuwa tena miongoni mwa timu 20 za ligi kuu ya England. Fulham mpaka inaporomoka ilikuwa imejikusanyia pointi 31, huku Cardiff ikiambulia pointi 30 tu.
Sunderland na Norwich zinakabana ili kujinasua na balaa la kushuka daraja na kuungana na Fulham na Cardiff. Sunderland ina pointi 35 na Norwich ina pointi 32.