Taarifa ya NCCR-MAGEUZI kwa Vyombo vya habari kuhusian na UKAWA.

NCCR – MAGEUZI
TAARIFA KWA VYOMBO VYA HABARI,
DAR ES SALAAM, ALHAMISI, 17 SEPTEMBA 2015
USHIRIKI WA VYAMA VYA NCCR – MAGEUZI, NLD, CUF NA CHADEMA KATIKA UKAWA.

UTANGULIZI
Sisi viongozi wa ngazi ya juu wa Chama cha NCCR-Mageuzi, Makamu Mwenyekiti, Katibu Mkuu tukiwa na Wajumbe wa Halmashauri Kuu ya taifa na viongozi wengine, tumekuja mbele yenu mtusaidie kufikisha ujumbe maalum kwa wanachama wetu na Watanzania wote wanaokiamini chama chetu,
Tumefika kuelezea kutoridhishwa na mwenendo wa ushirikiano wa vyama vinavyounda UKAWA. Tumekuja pia kuwaelezea ni hatua gani tulizoamua kuchukua kukabiliana na changamoto hii.
Wengi wenu mnafahamu kuwa UKAWA ni Umoja wa Katiba ya Wananchi ulionzishwa wakati wa Bunge Maalum la Katiba kutetea Rasimu ya Katiba iliyotokana na maoni ya wananchi dhidi ya uchakachuaji uliokuwa unafanywa na CCM.

UKAWA  siyo chama cha siasa bali umoja. NCCR-Mageuzi iliamua kujiunga na harakati hizi kwa nia njema ya kutetea maslahi ya taifa letu. Zaidi ya mwaka sasa tangu tujiunge na umoja huu, matokeo yake yamekuwa ni mabaya kwa uhai na ustawi wa chama chetu. Wakati vyama vingine vimezidi kuimarika ndani ya UKAWA, NCCR-Mageuzi imedhoofika. Hali hii haikubaliki.
MAKUBALIANO YA USHIRIKIANO BAINA YA VYAMA VYA UKAWA
Vyama vinavyounda UKAWA, vilisaini Makubaliano ya Ushirikiano katika Mkutano wa Hadhara kwenye viwanja vya Jangwani. Kitendo hicho kiliwavutia na kuwapa matumaini wananchi na wao wakazidi kutuunga mkono. Iliamuliwa kwamba tusiuwe vyama vyetu bali tuunganishe nguvu za vyama vyetu kama namna ya kujiimarisha kwa pamoja.
UCHAGUZI WA SERIKALI ZA MITAA DISEMBA 2014.
Kabla ya Uchaguzi wa Serikali za Mitaa wa mwaka 2014, vyama vinavyounda UKAWA vilitiliana saini ya Mwongozo wa Ushirikiano katika Uchaguzi huo.
Licha ya kutiliana saini Makubaliano hayo, bado kulikuwa na ukiukwaji mkubwa na wa makusudi  wa Mwongozo huo.
Licha ya kuzijadili changamoto zilizojitokeza katika Uchaguzi huo, lakini hazikupatiwa ufumbuzi wowote.
Sisi tuliopo hapa tulionya mapema kuhusu mwenendo huu wa kuvunja makubaliano na tukaomba taratibu tulizokubaliana zitumike ili kurudi kwenye misingi ya UKAWA lakini hatukusikilizwa.

USHIRIKIANO KATIKA UCHAGUZI MKUU, OKTOBA 2015.
Licha ya changamoto zilizokuwepo, tuliamua kwa pamoja kwamba vyama vya UKAWA tuingie katika Uchaguzi Mkuu tukiwa na makubaliano ya ushirikiano, ikiwemo kuwa na mgombea mmoja wa Urais na kuachiana majimbo ya uchaguzi.
Pia, katika kuendesha umoja huu, tuliunda vyombo vya kutusaidia ambavyo ni:-
Kamati ya Wenyeviti.
Kamati ya Makatibu Wakuu.
Kamati ya Ufundi.
Kamati ya Wataalam.
Pamoja na kuunda vyombo vya kuendesha UKAWA, tangu Januari 2015, bado tumeshindwa kujenga UKAWA imara na tuliyotarajia kwa manufaa ya wanaukawa  na wananchi kwa ujumla.
Yafuatayo yamethibitisha hili jambo:
Tumeshindwa kuweka Kanuni za uendeshaji wa UKAWA kama tulivyokubaliana. Kwa maana hiyo, tunafanya mambo kiholela
Tumeshindwa kuunda Kamati zitakazoshughulikia migogoro baina ya vyama.
Tumeshindwa kuunda na kuzisimamia Kamati za Majimbo
Tumeshindwa kupata muafaka wa kuachiana majimbo.
Mfano, NCCR – Mageuzi tuliachiwa majimbo 12 ya Kasulu Vijijini, Kigoma Kusini, Muhambwe, Kasulu Mjini, Vunjo, Ileje, Mbinga Mjini, Manyovu, Buyungu, Ngara, Nkenge na Korogwe mjini. Ikumbukwe kwamba, mwaka 2010, NCCR-Mageuzi ilisimamisha wagombea katika majimbo 67.
Kwa maana hiyo, UKAWA umeturidisha nyuma katika kupata wabunge na kuimarisha chama zaidi ya miaka 20 baada ya kuundwa kwake.

Licha ya kukubaliana kwamba NCCR-Mageuzi iachiwe majimbo 12, wenzetu wa vyama vingine katika UKAWA wamesimamisha wagombea katika majimbo 6 kati ya hayo. Wametuvunja moyo na kutuonyesha kwamba hawatujali. Na hata kule ambapo katika majimbo sita ambapo wametuachia bado wenzetu wanatufanyia fujo kuliko hata wanazotufanyia wanachama wa CCM. Tunamifano mingi ya kuonyesha ni jinsi gani wagombea wetu wanavyofanyiwa vurugu. 

Tumeshindwa kupata muafaka wa namna ya kuachiana wagombea udiwani katika kata nyingi.
Tumeshindwa kuonesha na kukubaliana kila chama kitapata nafasi gani na ngapi katika Serikali ya UKAWA.
Tumeshindwa kufuata utaratibu wa kumpata mgombea Urais wa UKAWA
Tumeshuhudia vurugu kubwa iliyoletwa ndani ya UKAWA na wanachama waliotoka CCM na wao kupewa umuhimu kuliko viongozi wa UKAWA. Zaidi ya Mbatia hakuna kiongozi wa NCCR-Mageuzi anayeshirikishwa, anayezungumza au aliyepo kwenye kampeni za mgombea Urais wa UKAWA.
Tumeshindwa kuwa na timu ya kampeni timu ya UKAWA, ambayo inagharamiwa na UKAWA na inatafuta fedha pamoja, kama ilivyokubaliwa.
Tunashuhudia UKAWA ambayo Chadema ndiyo UKAWA-Bara na CUF ndio UKAWA-Zanzibar. Chadema haijali Zanzibar na CUF haijali Bara. Na NCCR-Mageuzi haipo huku wala kule ikiendelea kudhoofika siku hadi siku. 
Tumeshindwa kuona uwazi katika matumizi ya fedha na maamuzi muhimu ya uendeshaji wa UKAWA.
Tumefadhaishwa na kuvunjwa kwa misingi ya kuanzisha kwa UKAWA.
Wakati NCCR imetii mgawanyo wa majimbo kwa vyama vinavyounda UKAWA, vyama vingine na hasa CHADEMA vimesimamisha wagombea kinyume cha makubaliano.

NINI KIFANYIKE NA UKAWA

Hatukuwaita hapa kuwaambia kwamba tunajiuzulu siasa kutokana na changamoto hizi. Tumeamua kupambana na kurudisha hadhi na heshima ya Chama chetu. Hatuwezi kubwaga manyanga. Tunataka kuitoa CCM madarakani kutokana na ulaghai na ujanja-ujanja wa miaka 50. Lakini hatuwezi kuitoa CCM kwa mbinu za ulaghai na ujanja-ujanja. Tunakwenda kukabidhiwa dhamana ya kuongoza nchi na Watanzania. Tunao wajibu wa kujiongoza vizuri ili tuwaonyeshe Watanzania kwamba tuna uwezo wa kuwaongoza vizuri.

WITO WETU
Tunamshauri Mwenyekiti wetu, ndg. James Mbatia, aitishe vikao vya kikatiba ili tuweze kujadiliana kuhusu hatima ya chama chetu.
Tunashauri ndg. Mbatia asiwemsemaji wa CHADEMA wakati anakiacha chama chake (NCCR-Mageuzi)kinadhoofika. Kwa mfano, Dr. Slaa alipoishambulia Chadema hakuna kiongozi wa Chadema aliyemjibu isipokuwa Mbatia ndiye aliyeamua kujiingiza kwenye ugomvi ndani ya Chadema.
Tutachangishana ili tusafiri kwenye majimbo na kata za wagombea wetu na kuwasaidia kwenye kampeni ili wasibaki wapweke kama yatima.

Tunasisitiza kwamba upinzani wa kweli nchini hauwezi kujengwa kwa njia za hila, kwa kukiuka taratibu za kidemokrasia tulizojiwekea wenyewe, kwa kukiuka misingi muhimu kama uadilifu, kwa kuweka mbele tamaa na maslahi binafsi kuliko taifa, kwa kutegemea propaganda. Tukifanya hivi, wananchi watashindwa kututoufautisha na CCM na wataamua kuchagua zimwi walijualo. Hatari hii tunaiona wazi kabisa.

……………………………
Leticia Ghati Mossore                       
                        Makamu Mwenyekiti (Bara)
NCCR-Mageuzi
17.09.2015

Mosena Nyambabe
Katibu Mkuu, NCCR Mageuzi

Read More

BantuTz MAGAZETINI:Soma kilichoandikwa katika magazeti yote ya leo Jumanne,Juni 2.

MAGAZETINI-Ni uratatibu ambao BantuTz imeuanzisha ili kuwawezesha wadau wote wa Bantu waweze kusomana kupitia kurasa za magazeti mbalimbali nchini kila siku asubuhi ili kuwasogezea karibu zaidi huduma kupata habari nuhimu baada ya maombi ya wadau mbalimbali.Hapa utasoma kurasa za magazeti yote nchini.

 

Endelea kufurahia huduma za BantuTz.com huku ukiusubiria kwa hamu Mtandao wa kijamii mkubwa na wa kisasa zaidi uitwao Bantuz hapo mwakani.

Read More

SIASA YA TANZANIA:-"RAFIKI WA MWIZI NAYE NI MWIZI"

             
Maisha ya siasa hayana rafiki wa kudumu wala adui wa kudumu.Maisha ya kisiasa yamezungukwa na maslahi.Utashi binafsi na matamanio ya kiutawala huzunguka wanasiasa wengi duniani.Wengine wana dhamira ya dhati na wengine ni "wapigaji" tu."Wapigaji" hawa ndio wale ambao kila skendo ya ufisadi lazima wawepo iwe wao kushiriki moja kwa moja au watu wao kushiriki moja kwa moja kupitia nguvu yao kisiasa.

Sakata la Escrow ni mwanzo wa siasa mpya kuelekea 2015.Kazi nzuri ya David Kafulila na Mwami Zitto Kabwe imejidhihirisha katika vikao vya bunge lililoisha wiki iliyopita.Hawa ni vijana kutoka mkoa wa Kigoma uliopo kanda ya Magharibi.Mwami Zitto akiwa ni mbunge kwa awamu mbili akiwakilisha Kigoma Kaskazini huku David Kafulila akiwa ni mbunge kwa awamu moja akiwakilisha Kigoma Kusini.

Hawa ni marafiki wa siku nyingi.Tangu wote wakiwa Chadema kabla ya Kafulila kuhamia NCCR Mageuzi baada ya kufitiniwa Chadema kwa kosa la kumnadi Mwami Zitto kurithi nafasi ya mwenyekiti Freeman Mbowe.Hata mgogoro wa kiuongozi kati ya Mbatia na Kafulila ulihusishwa na mkakati wa Mwami Zitto kujiunga na NCCR Mageuzi ili aukwae uenyekiti.

Mgogoro huu ulipelekea Kafulila asimamishwe uanachama na kukimbilia mahakamani kuweka pingamizi lililopelekea kuhudumu kama mbunge wa mahakama kabla ya mgogoro wake na Mbatia kusuluhishwa na yeye kurudishiwa uanachama wake.Kilichomtokea Kafulila ndicho kilichomtokea Mwami Zitto Kabwe pale Chadema.

Mwami Zitto aliitwa mnafiki,msaliti,mroho wa madaraka,mbakaji wa demokrasia ndani ya chama na mla rushwa pia kibaraka wa CCM.Urafiki wake na viongozi wa CCM unampa wakati mgumu kisiasa.Ila katika sakata la Escrow ajabu hadi wale waliomuita kibaraka wa CCM walijiunga naye na kumuunga mkono.Je nao waitwe vibaraka wa CCM!?

Siasa kweli haina rafiki wa kudumu au adui wa kudumu."Tumbili" na "Kibaraka" ndio vinara wa siasa za upinzani baada ya kuibua sakata la Escrow bungeni.Hata waliokuwa hawawapendi walijiunga nao.Hawakuwa na namna.Ukimya wao ungewahukumu 2015 majimboni mwao.Mbowe alimhitaji Zitto na Mbatia alimhitaji Kafulila.Mmoja wa rafiki zangu ambaye ni mwanachama wa Chadema ila mfuasi kindakindaki wa Mwami Zitto aliandika katika mitandao "Chadema bring back our Zitto" yaani Chadema turudishieni Zitto wetu.

Hii ni ishara kwamba Mwami Zitto na Kafulila ni nembo ya vyama watokavyo.Hawa ndio nyota wa mchezo kwasasa.Baya lolote dhidi yao ni maafa kwa vyama vyao.Ipo haja ya Chadema kuketi na kumaliza mgogoro wao na Mwami Zitto Kabwe.Huyu ndio kijana aliyeipa jina Chadema.Tangu sakata la Buzwagi,mabilioni ya Uswisi hadi Escrow.Mwami Zitto na Kafulila wanafanya siasa ya kisomi.Wanasoma sana na kuandika.Wanahoji kila lenye kuleta utata kwa maslahi ya taifa.PAC ni kati ya kamati bora za bunge kuwahi kutokea nchini.

"Kombinesheni" ya Deo Haule Filikunjombe na Mwami Zitto Kabwe katika PAC ni alama ya mwisho wa ufisadi nchini.Ukibaraka wa Mwami Zitto unafutwa na nyayo anazokanyaga PAC.Nyayo hizi zinawabomoa wabaya wake kisiasa.Hadi leo umekosekana ushahidi wa kumtia hatiani Mwami Zitto Kabwe.Siku chache kabla ya kusomwa kwa ripoti ya PAC bungeni kuhusu Escrow,Mbowe alifanya mkutano wa hadhara mkoani Kigoma na kumshambulia Mwami Zitto.Ila juzi wakakutana bungeni,Mbowe akaona umuhimu wa kumuunga mkono Mwami Zitto kutaka pesa ya umma irudishwe na wahusika wawajibishwe na kwa mara ya kwanza Mwami Zitto akashiriki kikao cha Ukawa.

Kinachotokea kwa Mwami Zitto na kilichotokea kwa David Kafulila natabiri kitatokea pia CCM.Ila kwa CCM nazungumzia mgogoro wa urais 2015.Hadi sasa kati ya wanaotajwa ni watatu tu ndani ya CCM wanaonekana wana misuli ya kupambana kisiasa kuwania tiketi ya kupeperusha bendera ya CCM katika kinyang'anyiro cha urais.Hawa ni Edward Ngoyai Lowassa,Mizengo Kayanza Peter Pinda na Bernard Kamillius Membe.

Lowassa ni waziri mkuu aliyejiuzulu kwa kashfa ya ufisadi wa mradi wa kufua umeme wa Richmond mwaka 2008.Mizengo Pinda ni waziri mkuu aliyemrithi Lowassa,naye amenusurika katika sakata la Escrow.Ila kama ilivyo kwa Lowassa na Richmond,Pinda naye ana doa tayari.Amebaki Membe peke yake.Akiwa hana doa.Ndani ya CCM sasa anaonekana ana uwezo wa kumrithi rais Kikwete.Wakati sakata la Escrow linarindima nchini wapinzani wa Membe walizusha katika mitandao kwamba Membe anahusika.Ripoti ya CAG na taarifa ya kamati ya PAC vikamsafisha kwa kutotaja mahali popote uhusika wa Membe au uhusika wa rafiki wa Membe.

Waingereza wana msemo wao usemao "tell me your friend and I will tell you your character" yaani nitajie rafiki yako nami nitakwambia tabia yako ikoje.Hii nukuu ina maana kubwa sana katika maisha ya sasa sio tu ya kisiasa.Ukiwa na urafiki na wahuni nawe utaonekana mhuni.Escrow inahusisha baadhi ya marafiki na watu wa karibu wa baadhi ya wanaotajwa kati ya Pinda na Lowassa.
Nani asiyejua kama Chenge ni rafiki wa karibu wa Lowassa? Leo hii kila baya linaloigharimu nchi lina mkono wa Chenge.Je anatumwa au kutumiwa na Lowassa? Isije ikawa anatumika kutafuta hela ya kampeni.Lowassa anaponzwa na marafiki wanaomzunguka.Marafiki wa Lowassa wanakigharimu chama na serikali.Hata kama tuko nao CCM basi mamlaka husika ziwashughulikie.Ccm sio kituo cha malezi ya wachafu.Nahofia wengine wanataka waingie madarakani ili kuficha uovu wao na wanaowazunguka.

Kwa namna mambo yanavyoenda naona kabisa anguko la Lowassa na Pinda katika mpambano wa ndani ya CCM.Moyo wangu unaniambia Membe anatufaa.Huku mitaani wananchi wamebadilika.Wanataka kiongozi anayeikataa rushwa bila kukwepesha maneno.Tangu sakata la Escrow liibuke kati ya Lowassa,Pinda na Membe ni Membe pekee aliyelikemea waziwazi mbele ya waandishi wa habari na wanazuoni.Mwenye ushahidi kuwa Lowassa au Pinda kusimama mbele ya kada yoyote ya jamii nje ya bunge na kukemea ufisadi wa Escrow anipinge kwa makala kama nilivyoandika mimi.

Pinda aliibariki Escrow kwa kusema haikuwa pesa ya umma.Lowassa aliibariki Richmond kwa kuitetea ipate tenda ya kufua umeme Tanzania ilhali akijua fika haina uwezo huo.Ripoti ya kamati teule ya Mwakyembe ikawaumbua wahusika.Tena wote wakiwa ni maswahiba wa Lowassa tuliozoea kuwaona na kusikia wakishiriki katika wizi wa mali ya umma kama vile Karamagi na Rostam Aziz.Nashawishika kuamini kwamba tabu,mateso na umasikini wa watanzania unahusika moja kwa moja na matendo ya hawa wanaotuhumiwa katika ufisadi mbalimbali nchini kama vile Escrow,Buzwagi,mabilioni ya Uswisi na Richmond.

Utajiri wa nchi hii upo mikononi mwa watu hawa wachache.Wanafaidi wao na watoto wao.Hatuna dawa hospitali,hatunywi maji safi na salama,hatuna umeme wa uhakika hadi vijijini,elimu ni duni,hakuna ajira yote kwasababu yao.Wanamfanya rais wetu awe kama yatima.Aliwaamini wakamwangusha na bado mirija waliyojijengea ya kufisadi nchi haijakatika.Hawa wanapaswa kuangushwa 2015 ndani ya CCM na katika majimbo yao ya uchaguzi.Na hili litakuwa zuri sana kama watapandishwa kizimbani kwa makosa ya jinai,itasaidia kuzuiwa kugombea hadi kesi zao za msingi mahakamani zimalizike.Nchi haitaki mtenda jinai.

Kwa nilichoandika hapa naamini nimewakera watu.Nimekera wapambe wao.Nimekera wasaka tonge kwao.Ila msimamo wa nilichoandika haubadiliki.Hawa tuwashughulikie tu ndani na nje ya chama.Tuwaulize, wamesahau nini serikalini kwa miaka yote ya wizi wao?Mwenye akili atang'amua mapema na kujiondoa katika makundi na mitandao yao.Nawaona baadhi wanawaza kujiunga na Membe.Wamegundua walipo sio mahali salama kwa uhai wa taifa letu na maisha yao kisiasa.Swali;je dhambi ya kumsemea uongo na kumfitini Membe wameitubu au wataitubu?Maana Membe pamoja na ukimya wake katika mbio za urais bado anasakamwa.Membe hajaoteshwa ila zengwe dhidi yake ni kubwa.

Nimshauri Membe asiwakubali marafiki wa aina ya Chenge au Karamagi katika kambi yake.Membe asitishwe na utafiti wa Twaweza.Utafiti wa Twaweza umewapigia mbiu wenye doa.Sisi wapigakura tunampigia mbiu yeye kati ya wote wanaotajwa.Nawaona mahasimu wa Membe wakijaribu kutaka kumuunga mkono ila tu awe makini nao.Samahani kwa niliowaudhi ila Membe hana makandokando,akioteshwa atatufaa.Yaliyomtokea 2012 akigombea Nec yanawarudi wanaomchukia.Kama yaliyowatokea Mwami Zitto Kabwe na Kafulila kuungwa mkono na mahasimu wao ndani ya vyama vyao katika sakata la Escrow ndicho kitakachotokea katika kuwania urais kwa Membe.Wabaya watajirudi ila tu awe nao makini.

Imeandaliwa na Hussein Bashe.

Read More

BARUA YA BASHE NA SERUKAMBA KWA RAIS J.M KIKWETE

Barua kwa Jakaya Kikwete

Leo tunaomba tukuandikie barua Baba yetu Jakaya Mrisho Kikwete.......Kwanza kabisa pole sana na ugua pole.......Baba yetu Kikwete, tunaomba tukupe taarifa/ripoti katika kipindi hiki unapoendelea na matibabu

Baba While you are away, serikali yako inaelekea kuanguka

Baba while you are away, mzimu wa ESCROW umeibuka

Baba while you are away, waziri mkuu wako kafumbia macho swala la ESCROW

Baba while you are away, Waziri mkuu wako kazomewa na wabunge wote

Baba while you are away, waziri mkuu wako kaungana na mahakama kunyima uhuru bunge letu tukufu

Baba while you are away, Rugamalila anagawa fedha kama njugu

Baba while you are away, Diallo kapewa fedha za ESCROW na kununua helcopter kwa ajili ya kumpigia Membe kampeni

Baba while you are away, tender ya kuingiza sukari PM kampa Janeth Masaburi bila kufata utaratibu

Baba huyo Janeth ndiyo mke wa kampeni meneja wa Pinda, bwana Didas Masaburi

Baba while you are away, Makonda alimpiga mzee Warioba na juzi juzi tena alimpiga mjumbe wa UVCCM Dodoma

Baba while you are away, fedha ambazo alipewa waziri wako kutoka Libya zimeanza kumtokea puani

Baba while you are away Werema, Maswi, Muhongo, Membe, Ndulu na Tibaijuka hutawakuta madarakani

Baba while you are away, fedha za ESCROW zilimwagwa Maisha Club na vibaraka wa PM e.g Mbogo, Hapi na Sara Msafiri

Baba while you are away, baraza la UVCCM lilimkataa Pinda kuwa Naibu Kamanda

Baba while you are away, kuna watu wameacha biashara ya nyuki na kuingia katika kupiga dili za mjini

Baba while you are away, waziri wako kapokea billion moja kutoka kwa rafiki, ni bahati ilioje baba

Baba while you are away, magazeti ya ulaya wamegundua ya kwamba makazi ya wamasai yameuzwa kwa mwarabu na mhusika mkubwa ni waziri wako wa Maliasili bwana Nyalandu

Baba while you are away, imegundulika tena waziri wako Membe ndiye anayetoa siri za baraza la mawaziri, na ndiye aliyekuwa anatoa siri na kuwapa wapinzani, je uaminifu wa kiapo chake kiko wapi?

Baba while you are away, yule msanii aliyeenda Marekani na waziri wako imegundulika ana ujauzito wa miezi 2

Baba while you are away, wahisani inasemekana wametishia kukata misaada

Na mwisho.................................
Baba while you were away TWAWEZA wametoa utafiti uliowapa matumaini makubwa wananchi

Baba while you are away ni watanzania wawili tu wamekuweka katika maombi ili uweze kupona haraka baba na kurudi nchini nao ni Mzee Lowassa na Mzee Cornel Apson.......

Baba while you are away,Edo naye yupo Ujerumani katika matibabu.

Asante Baba kwa kutusikiliza,
Kwa niaba ya Mzee Edo,

Ni sisi wanao,
Hussein Bashe na Peter Serukamba.

Read More

Tazama picha za Mh.Benard Membe akiwa katika shughuli zake za kidiplomasia.

Tazama picha za Waziri wa Mambo ya Nje na Ushirikiano wa Kimataifa Mh.Bernard Kamillius Membe akiwa katika kazi zake za kidiplomasia na viongozi wa kitaifa na kimataifa.

Read More