Maoni ya dunia baada ya Moyes kutimuliwa,Hisa zapanda baada ya Moyes kufukuzwa...................soma hapa.................

 

WAKATI baadhi ya Wachambuzi wanaosifika wa Soka pamoja na Wachezaji Nyota wa zamani wakimuonea huruma David Moyes kwa kufukuzwa kazi kama Meneja wa Manchester United, wapo ambao wameona hilo ni sawa huku Hisa za Klabu hiyo zikiongezeka thamani kwenye Soko la Hisa mara baada Taarifa za Moyes kutangazwa na pia lile Bango lililotundikwa Uwanjani Old Trafford, ‘THE CHOSEN ONE’ likiwa mbioni kuenguliwa.

Mchezaji wa zamani wa England, Liverpool na Manchester United, Michael Owen, amesema: “Hii ni taarifa kubwa kutoka Old Trafford lakini mwisho wa Msimu huu kuna fungu kubwa la Fedha kununua Wachezaji, Man United ilibidi wawe na uhakika wa Asilimia 100 kama Moyes ndie Mtu sahihi kulitumia! Ukweli ni kuwa hawakuwa na imani nae, na huu ulikuwa wakati muafaka kumtimua!”

Nae Staa wa zamani wa Man United, Dwight Yorke, amesema Ryan Giggs ni chaguo safi na kuongeza: “Kwa kuendeleza ile staili ya asilia ya Man United, nadhani Ryan Giggs anastahili!”

Jamie Carragher, Beki wa zamani wa Liverpool na England, amesema uamuzi huo ulikuwa hauepukiki na kutamka: “Siku zote Moyes angekuwa na wakati mgumu lakini haya ni maafa! Huu ni Msimu mbovu kabisa!”

Paul McGrath, Mchezaji wa zamani wa Man United, amedai Moyes aliyavaa maji mazito na kusema: “Sidhani kama Moyes ana hulka sawa na Sir Alex Ferguson! Alionekana ni Mtu alie kwenye presha Msimu wote!”

Lakini Gary Lineker, Mchezaji wa zamani wa England ambae sasa ni Mchambuzi na BBC, amezungumza: “Ni kazi ngumu kuwa Meneja wa Man United baada ya Sir Alex Ferguson!”

Carlo Ancelotti, Meneja wa Real Madrid, amesema: “Namsikitikia David Moyes. Kiujumla haya ndio maisha ya Kocha. Mara nyingine mambo hayaendi vizuri na wanakutimua na hiyo basi. Nimeshangaa kwa sababu Man United desturi yao sio hivyo. Kwa Klabu nyingine ni sawa, lakini kwa Man United baada ya Miaka 26, nimeshangaa!!”

Nae Sean Bones wa Manchester United Supporters' Trust, MUST, amewanyoshea kidole Wamiliki wa Man United, Familia ya kina Glazer, kwamba walifanya makosa toka mwanzo kumchagua David Moyes kama Meneja wakati hakuwa na Rekodi yeyote ya kuongoza Klabu kubwa.

Nae Mtangazaji wa TV huko England, Piers Morgan, ambae ni Shabiki wa Arsenal, amenena: “Moyes alimrithi Mtu ambae alitwaa Vikombe 10 katika Miaka 9 iliyopita. Meneja anaefuata Arsenal atamrithi Mtu ambae hajatwaa Kikombe chochote katika Miaka 9, hiyo ndio tofauti!”

Wakati huo huo, Hisa za Man United zimeongezeka Thamani ya Asilimia 1 kwenye Soko la Hisa huko New York mara tu baada ya kutangazwa kufukuzwa David Moyes.

Pia, zipo habari kuwa lile Bango kubwa lililotundikwa Old Trafford kwenye Jukwaa la Stretford End, ‘THE CHOSEN ONE’, litaenguliwa na kupelekwa kwenye Makumbusho ya Soka ya Kitaifa Mjini Manchester.

Bango hilo liliwekwa ili kukubali mapendekezo ya Sir Alex Ferguson kuwa David Moyes ndie anaefaa kuwa Mrithi wake.