Kifungo cha kutosaini wachezaji:Barca wajipa moyo, wana imani wataruhusiwa......fuatilia hapa....

Barcelona ina imani kubwa kuwa wataweza kusaini Wachezaji wapya mwishoni mwa Msimu huu licha ya FIFA kuwafungia kutosaini Mchezaji yeyote mpya kwa Vipindi viwili vya Usajili.

Barca walipewa Adhabu hiyo na FIFA baada ya kukiuka Kanuni za kusaini Wachezaji 10 walio chini ya Umri wa Miaka 18 na Adhabu hiyo inadumu hadi Juni 2015.

Hata hivyo, Makamu wa Rais wa Barca, Manel Arroyo, amewaambia Wanahabari kuwa Klabu yao inafanya kazi na Shirikisho la Soka la Spain, RFEF, ili kukata Rufaa kupinga Adhabu ya FIFA.

RFEF pia iliadhibiwa na FIFA kwa makosa hayo ya Barca kwa kupigwa Faini.

Arroyo amesema: “Tunaifanyia kazi Rufaa ambayo itaturuhusu tufanye Usajili kwa kuiondoa Adhabu kwa muda. Tuna hakika tutafanikiwa na mwishoni mwa Msimu tutapata Wachezaji wapya!”

Duru toka ndani ya Klabu ya Barcelona zimedokeza kuwa ikiwa FIFA itaitupa Rufaa yao, wao wako tayari kupeleka suala hili huko kwenye Mahakama ya Usuluhishi Michezoni, CAS [Court of Arbitration for Sport] ambako ipo desturi ya kuisimamisha Adhabu inayolalamikiwa hadi wao watakapotoa Hukumu ya Rufaa,

Rufaa hizi zinaweza kuwapa fursa Barca kukamilisha Dili ambazo sasa tayari zimefanikiwa kufikia makubaliano zinazowahusu Kipa wa Borussia Moenchengladbach Marc-Andre ter Stergen na Mchezaji wa Miaka 17 wa Croatia, Alen Halilovic, ambae anatimiza Miaka 18 Mwezi Juni.