BILAL,MAGUFULI NA KOVA WANUSURIKA KIFO BAADA YA KUANGUKA NA HELIKOPTA

VIONGOZI wanne wa kitaifa, wamenusurika kufa baada ya helikopta waliyopanda kwa ajili ya kukagua na kuangalia athari za mafuriko jijini Dar es Salaam, kuanguka wakati ikitaka kuruka.
Helikopta hiyo ambayo inaelezwa kwamba ndiyo kwanza ilikuwa inaanza kuruka, ilianguka ghafla baada ya kutokea hitilafu katika injini yake.
Viongozi walionusurika kifo katika ajali hiyo ya helikopta mali ya Jeshi la Wananchi wa Tanzania (JWTZ) ni Makamu wa Rais Dk. Mohamed Gharib Bilal, Waziri wa Ujenzi, Dk. John Magufuli na Kamanda wa Polisi Kanda Maalumu ya Dar es Salaam, Suleiman Kova.
Ndani ya helikopta hiyo, alikuwemo pia Mkuu wa Mkoa wa Dar es Salaam, Said Meck Sadik, waandishi wa habari wawili na maofisa wengine kutoka ofisi ya Makamu wa Rais ambao idadi yao ilikuwa 11.
Wengine walionusurika ni marubani (wawili), walinzi wa viongozi (wawili) na ofisa mmoja kutoka Ikulu.






Waandishi wa habari waliokuwa katika helikopta hiyo ni mpiga picha wa kituo cha Channel Ten, Khamis Suleiman na George Kasembe wa TBC.
Taarifa zinaeleza kuwa helikopta hiyo ilipata hitilafu wakati ilipotaka kuruka katika Uwanja wa Ndege wa Jeshi (Airwing) Ukonga, Dar es Salaam na kushindwa kuruka.
Mtoa taarifa wa tukio hilo ambaye hakutaka kutaja jina kwa kuwa si msemaji wa jeshi hilo, alisema hakuna madhara yoyote yaliyotokea kwa viongozi hao na wengine, lakini walipelekwa katika Hospitali ya Taifa ya Muhimbili kwa ajili ya uchunguzi zaidi wa afya zao.
Akizungumza na Tanzania Daima jana, Kamanda wa Polisi  wa viwanja vya ndege nchini, Khamis Suleiman, alisema ajali hiyo iliyohusisha helikopta namba JWTZ 9505,  ilitokea jana, majira ya saa 3:25 asubuhi.
“Ni kweli ajali imetokea na baadhi ya waandishi waliokuwemo kwenye helikopta hiyo ambayo uchunguzi wa awali unaonyesha ilipata hitilafu wakati inaruka,” alisema Kamanda Suleiman.
Aliongeza kuwa viongozi hao waandamizi wa serikali walikuwa katika ziara ya kukagua maeneo mbalimbali ya Jiji la Dar es Salaam yaliyokumbwa na mafuriko kutokana na mvua zinazoendelea kunyesha, ambazo hadi sasa zimesababisha vifo vya watu zaidi ya kumi na uharibifu wa miundombinu.
Baadhi ya majeruhi wa ajali hiyo, Kamanda Kova na Mwandishi wa Channel Ten, Suleiman, walipozungumza na Tanzania Daima kwa nyakati tofauti kuhusu hali zao, walisema wanaendelea vizuri.
Katika kuonyesha kuwa hakukuwa na madhara ya ajali hiyo, Makamu wa Rais Dk. Bilal baada ya ajali hiyo, alikwenda kukagua maeneo yaliyoathirika na mafuriko kwa kutumia gari baada ya helikopta hiyo kupata hitilafu.
Taarifa ya JWTZ
JWTZ limesema kuwa helikopta hiyo ilipata ajali jana, majira ya saa 3:30 asubuhi wakati ilipokuwa katika hatua ya kuanza kuruka.
Taarifa kwa vyombo vya habari iliyotolewa na Kurugenzi ya Habari na Uhusiano, Makao Makuu ya Jeshi, Upanga, ilieleza kuwa helikopta hiyo mbali na kubeba viongozi hao, walikuwapo pia  Dk. Mnzava, Msaidizi wa Makamu wa Rais, Msaidizi wa Kamanda Kova na waandishi wa habari watatu.
“Ujumbe wa Makamu wa Rais wa Jamhuri ya Muungano wa Tanzania ulikuwa  katika safari ya kuzungukia maeneo yaliyoathirika na mafuriko katika Jiji la Dar es Salaam na Mkoa wa Pwani kutokana na mvua kubwa iliyoanza kunyesha juzi hadi sasa.
“Makamu wa Rais pamoja na ujumbe wake hawakupata majeraha katika ajali hiyo. Aidha, rubani na wasaidizi wake pia wametoka salama,” ilieleza taarifa hiyo.
Taarifa hiyo ilieleza uchunguzi wa ajali  hiyo umeanza ili kubaini chanzo chake