MAELFU WAKWAMA DARAJA LA RUVU

MAELFU ya abiria waliokuwa wakisafiri kutoka jijini Dar es Salaam na wengine wakitokea mikoani wamekwama kutokana na daraja la Mto Ruvu lililopo wilayani Kibaha, Pwani kujaa maji kutokana na mvua zinazoendelea kunyesha.
Mvua hiyo ambayo ilianza kunyesha mfululizo tangu juzi, imesababisha uharibifu mkubwa wa miundombinu ambayo imesababisha magari makubwa na madogo kushindwa kuendelea na safari zao.
Kutokana na daraja hilo kujaa maji, magari yaliyokuwa yakitokea Dar es Salaam kuelekea mikoa mingine ya jirani na nje ya nchi yamekwama katika eneo la bonde la Mto Ruvu na kusababisha foleni kubwa.
 
Mbali na magari hayo yaliyokuwa yakitokea Dar es Salaam kushindwa kuendelea na safari, pia magari ambayo yalikuwa yakitokea mikoa mingine kuelekea Dar es Salaam nayo yalikwama.
Mkuu wa Wilaya ya Kibaha, Halima Kihemba, alisema kutokana na maji kujaa katika daraja hilo, ilibidi watoe tahadhari kwa magari yote yanayopita katika barabara hiyo kutoendelea na safari hadi yatakapopungua.
Alisema serikali itahakikisha inaweka utaratibu mzuri ambao utasaidia kwa kiasi kikubwa wale wote ambao wamekumbwa na mafuriko katika nyumba zao kutokana na mvua hizo.
Kihemba alisema kwamba kutokana na hali hiyo, wananchi wa maeneo ya Mlandizi na mengine kuwa makini katika kipindi hiki, kwani mafuriko yanaweza kusababisha kupoteza maisha ya watu na kuharibu miundombinu.
Mwenyekiti wa Mamlaka ya Mji Mdogo wa Mlandizi, Abdallah Kido, alisema katika mji wa Mlandizi hali ni mbaya kutokana na mafuriko hayo kusababisha madhara makubwa kwa wananchi na magari kushindwa kuendelea na safari.