ALICHOKISEMA MBATIA KUHUSU WASOMI NA WANA-CCM JUU YA HOJA ZA MUUNGANO

Mjumbe wa Bunge Maalumu la Katiba, James Mbatia, jana amewashambua wajumbe waliowengi bungeni na wasomi, kwa kulipotosha taifa katika mchakato wa kupata Katiba Mpya kutokana na kutumia takwimu na taarifa zisizo sahihi na kufanya propaganda katika suala la Katiba.

Akitoa ufafanuzi wa hoja za walio wachache katika kamati namba 12, Mbatia alisema ni hatari sana, kuingizwa ushabiki na propaganda kwa masuala muhimu kama Katiba ambayo yanahusu masilahi ya taifa.

Mbatia alisema wajumbe waliowengi, hawasomi nyaraka na kumbukumbu mbalimbali, ambazo zinazungumzia mambo ya Muungano, badala yake wamekuwa wakitoa taarifa zisizosahihi na kushindwa kujenga hoja.

“Inashangaa sana kuna wasomi hapa na maprofesa, wanatoa takwimu potofu na ndiyo hawa ambao walimpotosha hata Rais Jakaya Kikwete alipokuja kuzindua Bunge la Katiba kwa kutoa takwimu zisizo sahihi”alisema.

Mbatia alitupia lawama kwa kituo cha Utangazaji cha Taifa (TBC), kwa kukubali kuonyesha ibada ya kumwombea kifo, iliyoandaliwa na vijana walioandaliwa wa Chuo Kikuu cha Dar es Salaam ndani ya miaka mitano, Jaji Joseph Warioba kiongozi ambaye anaheshimika ndani na nje ya nchi.

Alifafanua kuwa, baadhi ya wajumbe kwa kutosoma, wamekuwa wakitioa taarifa potofu juu ya Serikali ya Tanganyika, kuwa tayari ilifutwa lakini hawajui hata katika katiba ya sasa Serikali ya Tanganyika inatajwa.