AZAM FC YATWAA UBINGWA,YAWEKA HISTORIA

AZAM FC iliweka historia mpya baada ya kutwaa ubingwa wake wa kwanza wa Ligi Kuu ya Vodacom Tanzania Bara 2013/14 kufuatia ushindi wa magoli 2-1 dhidi ya Mbeya City kwenye Uwanja wa Sokoine jana licha ya Yanga iliyo katika nafasi ya pili nayo kushinda 2-1 dhidi ya JKT Oljoro kwenye Uwanja wa Sheikh Amri Abeid, Arusha.

Ilikuwa ni mara ya kwanza katika miaka 14 kwa timu nje ya Simba na Yanga kutwaa taji hilo tangu Mtibwa Sugar ya Morogoro ilipolibeba mara mbili mfululizo mwaka 1999 na 2000.

'Wanalambalamba' ambao wametwaa kombe hilo bila ya kupoteza mchezo, waliingia uwanjani jana wakihitaji pointi tatu ili kufikisha pointi 59 ambazo haziwezi kufikiwa na timu nyingine, walipata ushindi waliouhitaji kwenye uwanja huo mgumu ambao wageni wa ligi Mbeya City walikuwa hawajapoteza mchezo.


Yalikuwa ni mafanikio makubwa kwa kocha Mcameroon Joseph Omog, ambaye ameutwaa ubingwa huo katika jaribio lake la kwanza baada ya watangulizi wake kushindwa na kuishia kushika nafasi ya pili katika misimu miwili mfululizo iliyopita.

Kwa kutwaa ubingwa huo, Azam wataiwakilisha nchi katika michuano ijayo ya Ligi ya Klabu Bingwa Afrika kwa mara ya kwanza kwao, huku Yanga ambayo imejihakikishia kumaliza katika nafasi ya pili kwa kufikisha pointi 55, itacheza Kombe la Shirikisho Afrika.

Mbeya City licha ya kushiriki ligi hiyo kwa mara ya kwanza imejihakikishia kumaliza katika nafasi ya tatu licha ya kipigo cha jana ikiwa na pointi 46, ambazo haziwezi kufikiwa na timu za chini yao.

Simba iliyokuwa na msimu mbaya ambao hawatapenda kuukumbuka, ilikumbana kipigo kingine kisichotarajiwa cha 1-0 dhidi ya Ashanti United kwenye Uwanja wa Taifa jana na kujiweka katika hatari ya kuikosa hata ya kumaliza katika nafasi ya nne ya msimamo wa ligi hiyo iliyobakisha mechi moja kumalizika. Goli hilo lilifungwa na Mohammed Nampaka katika dakika ya 17.

Gaudence Mwaikimba aliipatia Azam goli la kuongoza katika dakika ya 44 kufuatia pasi ya Erasto Nyoni lakini Mwegane Yeya ambaye aliifunga Azam 'hat-trick' katika mechi yao ya mzunguko wa kwanza iliyomalizika kwa sare ya 3-3 kwenye Uwanja wa Azam Complex, aliisawazishia Mbeya City katika dakika ya 70 akimalizia mpira uliotemwa na kipa Aishi Manula kufuatia shuti la Deus Kaseke. Yeya awali katika dakika ya 19 alipiga shuti lililogonga mwamba na kuokolewa na beki wa Azam, Said Morad.

John Bocco alifunga goli lililowapa ubingwa Azam katika dakika ya 86 kwa kichwa na kufanya mpira usimame kwa muda wachezaji wa Mbeya City wakipinga bao hilo.


Mjini Arusha, Yanga walitangulia kufungwa kwa goli katika dakika ya 68 lakini walisawazisha dakika mbili baadaye kupitia kwa mtokeabenchini Rajab Zahir akiunganisha kwa kichwa mpira wa 'fri-kiki' uliopigwa na Juma Abdul na Mrisho Ngasa akafunga la ushindi katika dakika ya 73 akiunganisha kwa mguu mpira wa kona ya Simon Msuva.

Mgambo na Kagera Sugar zilitoka 0-0, wakati Ruvu Shooting ilishinda 1-0 dhidi ya Mtibwa Sugar kwa goli la Elias Maguli (dk.36).

Matokeo yalimaanisha kwamba Oljoro na Rhino zimeshuka daraja.